“Open Balkan”, Shkodra: Iniciativa është pozitive

Sekretari i Përgjithshëm i Shoqatës së Prodhuesve, Arben Shkodra, thotë se duhet parë pozitivisht çdo iniciativë qeveritare që tenton të çlirojë potenciale apo heq vështirësitë përsa i përket lëvizjes së qytetarëve dhe ndërveprimet ekonomike të shteteve përkatëse. Fjalën Shkodra e ka për ”Open Balkan”.

”Duhet të nisim një marrëdhënie të re me vendet e Ballkanit Perëndimor, që të krijojmë mundësi të reja zhvillimi të ekonomisë sonë”. Për të ka klimë goxha mes bizneseve të rajonit, por thekson se ajo që i ka penguar ka qenë gjithmonë politika konfliktuale.

”Po shitet politikisht se ne duam të krijojmë një shtrat të 4 lirive që duhet të jenë të pranuara dhe implementuara nga të gjitha shtetet, por ne e dimë që nuk ka asnjë shans që shtetet të cedojnë nga mundësia për të qenë konkurrues. Nganjëherë, këta vende e krijojnë duke vendosur barriera jotarifore. Është paksa utopike kjo, duke u nisur nga karakteri ballkanas që kemi të gjitha shtetet”.

Shkodra thekson se Shqipëria i ka pasur të gjitha mundësitë që t’i hiqte barrierat me Kosovën prej kohësh.