Operacioni “Balcania”, 14 të arrestuar në Shqipëri e Itali për drogë e prostitucion

Një operacion policor ndërkombëtar, i shtrirë në Itali e Shqipëri, ka çuar në arrestimin e 14 personave, që dyshohet të jenë pjesë e një grupi kriminal të organizuar për shpërndarjen e lëndëve narkotike dhe shfrytëzimin e prostitucionit.  Operacioni, i koduar me emrin “Balcania”, ka nisur rreth orës 05:30 të kësaj të enjteje dhe është shtrirë në qytetet Rimini, Foxhia, Ravenna dhe Piacenca; ndërsa në Shqipëri, në Tiranë e Durrës. Ergyst Çeka, 26 vjeç, u arrestua në Tiranë, ndërsa Kujtim Jangozi, 40 vjeç, u prangos në Krujë, sipas policisë, “me qëllim ekstradimi drejt Italisë”.  Policia shqiptare dhe ajo italiane janë duke vijuar hetimet, ndaj deri tani kanë publikuar vetëm inicialet e të arrestuarve të tjerë.

Burime zyrtare të policisë shqiptare saktësojnë se nga të arrestuarit, 8 janë shtetas shqiptarë, 5 rumunë dhe 1 person shtetas italian.

Dy shqiptarët janë arrestuar në Tiranë dhe në Durrës, ndërsa 6 të tjerët, së bashku me rumunët dhe italianin, janë prangosur në Itali. Në pranga nw Itali kanë rënë shtetasit shqiptarë me inicialet E.C, A.H, E.C, K.J, A.D, E.SH, E.V dhe G.D

Qëllimi i operacionit, shtuan burimet, ishte ekzekutimi i 14 urdhër-arresteve, dy nga të cilët ishin ndërkombëtarë. – “Të gjithë personat e arrestuar dyshohen se janë pjesë e një grupi kriminal të organizuar, i përfshirë në shpërndarjen e lëndëve narkotike dhe shfrytëzimin e prostitucionit në zonën e Riminit”, saktësuan burimet policore.