Pa asnjë ndihmë pas tërmetit, katër anëtarë të familjes Uku jetojnë në një dhomë të shkatërruar

Kjo është e vetmja strehë e katër anëtarëve të familjes Uku në fshatin Stermas të komunës Petrelë.

E zonja e shtëpisë tregon se ajo me bashkëshortin dhe dy fëmijët e saj 6 dhe 11 vjeç jetojnë në një dhomë të dëmtuar nga tërmeti i 26 nëntorit.

“Mundësi për shtëpi nuk kam, e frikshme është.”

Vjollca, 37-vjeçe, thotë se që pas tërmetit askush nuk u interesua për familjen e saj.

“Fare, nuk ka ardhur njeri.”

Thotë se ka frikë se mos një tërmet tjetër i zë brenda pasi shtëpia është e dobët.

Kërkon nga shteti ndërtimin e një shtëpie pasi vetë nuk kanë mundësi.

“Vetëm për këta fëmijë, janë të vegjël. Të paktën të kenë shtëpi.”

Familja Uku jeton me 200 mijë lekë të ardhura nga puna e kryefamiljarit si roje në një subjekt privat dhe siç tregon e zonja e shtëpisë, të ardhurat që marrin nuk u dalin as për tu ushqyer ndaj dhe kërkon ndihmë nga shteti. /Ora News