Pagat e mësuesve, Vokshi i përgjigjet Ramës: I ke lënë në baltë, Shqipëria s’e ka luksin të rrijë edhe 4 vite në vendnumëro
Ish-deputetja e PD, Albana Vokshi i është përgjigjur Ramës duke i vënë në dukje se për 8 vite nuk i rriti pagat mësuesve.
Vokshi thotë se Rama i bëri vetëm një rritje 30 euro, pa shpërblime, ndërsa po u vjedh orët shtesë të pandemisë.
Ajo kujton se në ish-qeverinë e PD pagat e mësuesve u rritën 2 herë, dhe shpërblimi në fundvit ishte 100 mijë lekë, ndërsa tashmë me Bashën rrogat do të shkojnë të paktën 700 euro.
Sipas saj, Rama i la në baltë mësuesit kurse PD do të investojë për ta, nxënësit dhe arsimin.
DEKLARATË E PARTISË DEMOKRATIKE, ALBANA VOKSHI
Edi Rama sot bëri një autogol në tentativën për të mashtruar publikun për programin tonë të arsimit. Në të vërtetë, tregoi se për 8 vjet, që nga 2013-2021, ai i la në baltë mësuesit dhe nuk i rriti pagat e tyre.
Janë 8 vjet dështime në arsim. 34 mijë mësues dhe familjet e tyre janë në vendnumëro me Edi Ramën.
Nuk ishte kështu më qeverinë e Partisë Demokratike. Ne i rritëm pagat mbi 2 herë. Shpërblimi në fund të vitit ishte 100 mijë lekë. Ndërsa Edi Rama, i mashtroi dhe i braktisi. Për 8 vjet i ka rritur pagat e mësuesve diku tek 30 euro, shpërblimi I fundvitit është harruar, ndërsa prej një viti u vjedh mësuesve edhe orët shtesë të pandemisë.
Mësuesit janë të lënë në baltë nga qeveria e Edi Ramës. Janë të tallur, të fyer, të stërmunduar dhe të keqpaguar. Këta ishin 8 vitet më të këqinj për arsimin, për nxënësit, për prindërit dhe për të gjithë vendin.
Janë 8 vjet në vendnumëro. E gjithë Shqipëria është në vendnumëro për shkak të dështimeve të Edi Ramës.
Shqipëria nuk e ka luksin të rrijë edhe 4 vjet të tjera vend numëro me Ramën. Ka ardhur koha për ndryshim, sepse ata që e lanë në baltë Shqipërinë, nuk mund ta çojnë drejt suksesit.
Në qeverinë e Lulzim Bashës do të garantojmë që paga e mësuesve të jetë të paktën 700 Euro. Duke investuar për arsimin, ne kemi investuar për fëmijët tanë dhe për të ardhmen e tyre të sigurtë.
Më 25 prill, Edi Rama do të humbasë dhe do të fitojë Shqipëria!
