Pallati i Bashës, Bojaxhi: Ky është veprim i turpshëm, të anuloj lejen për këtë ndërtim po u zgjodha kryebashkiak

Kandidati i pavarur për bashkinë e Tiranës, Gjergj Bojaxhi, e ka cilësuar si një veprim të shëmtuar lejen që kreu aktual i bashkisë i ka dhënë “vetes” për ndërtimin e një kati në pallatin ku ai jeton. Në një prononcim për TemA, Bojaxhi i ka drejtuar dy pyetje Lulzim Bashës, nëse ka marrë leje nga banorët për shtesën e katit dhe nëse ka bërë konsultime publike dhe ka marrë lejen mjedisore. Bojaxhi deklaroi se nëse do të zgjidhet kryetar Bashkie, do ta anulojë ndërtimin e shtesës.

“Nëse kjo leje është e paligjshme, unë do ta anulloj. Fatkeqësisht informacioni publik mbi këtë vendim është i mangët. Për këtë arsye, dëshiroj të bëj dy pyetje publike për Zotin Basha:

1.A ka marrë zoti Basha miratimin me shkrim të të gjithë banorëve të pallatit, të cilët janë ligjërisht bashkëpronarë të tarracës mbi të cilën do të kryhet ndërtimi?

2.A është bërë konsultim me publikun për këtë ndërtim ashtu siç e kërkon legjislacioni i mjedisit para se të jepet leja?

Nëse këto detyrime apo edhe detyrime të tjera ligjore nuk janë plotësuar leja është e paligjshme dhe të gjithë punonjësit e bashksië që e kanë miratuar atë duhet të mbahen përgjegjës. Praktika të tilla të fshehta do të marrin fund me politikën tonë të transparencës totale: çdo vendim, leje, kontratë, transaksion dhe document tjetër i Bashksië do bëhet menjëherë publik dhe në mënyrë lehtësisht të arritshme nga çdo kush që dëshiron”, deklaroi Bojaxhi./