Panariti: Tirana, kryeqyteti më i ndotur i Europës! Edhe pa Covid të duhet maska

Ish-ministri i Bujqësisë, Edmond Panariti ka ironizuar me treguesit shëndetësorë e klimatikë në Tiranë duke theksuar se tashmë është kryeqyteti më i ndotur në Europë.

Sipas Panaritit edhe pa Covid duhet maska në Tiranë si brenda edhe jashtë. Panariti shton gjithashtu se Tirana është një ‘serë’ e vërtetë dhe konkurent për ndotjen ka vetëm Çeliabinskun e Rusisë.

STATUSI NGA EDMOND PANARITI

Tirana e tiranizuar!
Si të rrish jashtë apo edhe brënda është njësoj.
Edhe pa covid të duhet maska!

Edhe pa koronavirus, treguesit shëndetësor dhe klimatikë të Tiranës janë katastrofikë.
Sipas Numbeo, Tirana është kryeqyteti më i ndotur i Evropës dhe ndër qytetet më të ndoturit në botë.
Kemi konkurent vetëm Çeliabinskun e Rusisë.
Tirana është një “serë” e vërtetë!
Në doni të studjoni efektin serë në miniaturë dhe pasojat mbi klimën dhe shëndetin, eja në Tiranë.
Qyteti nxehet por nuk ftohet, sepse betoni që po shtohet lart dhe anash saj e ndrydh të nxehtin dhe pengon rrymat ajrore të lindjes, Veriut dhe perëndimit të freskojnë dhe stabilizojnë temperaturat.
Nëse do të konsultoni temperaturat mesatare shumëvjeçare dhe lagështinë e ajrit, do të vini re se të parat janë rritur ndërsa të dytat janë ulur ndjeshëm nga betoni dhe betonizimi pa mëshirë, pa kriter, pa hesap.
Sot lagështia e ajrit në Korçë eshtë 15 % më e lartë se në Tiranë, kur kjo e fundit është vetëm 30 km larg detit.
Për ti rënë shkurt, temperatura e lartë, lagështia e ulët dhe ndotja më e lartë në Evropë e ka shndërruar Tiranën në një rrezik publik edhe pa covid.
Njësoj si brënda dhe jashtë! Nuk duhej pritur Koronavirusi për të mbajtur maskë në Tiranën e tiranizuar.