Papa Françesku pagëzon 6 shqiptarë

Papa Francesku ka pagëzuar gjashtë shqiptarë në Meshën e mbajtur në Vigjilie të Pashkëve. Gjatë fjalës së tij ai dënoi aktet terroriste teksa kërkoi nga besimtarët e krishterë që të mos burgosen nga frika dhe pesimizmi.  Ati i Shenjtë tha se shpresa duhet të triumfojë mbi mërzinë teksa tha se disa militantë nuk duhet të përdorin emrin e Zotit për të justifikuar aktet e tyre të dhunshme. Përgjatë gjithë javës Vatikani ka qënë nën masa të rrepta sigurie, ndikuar edhe nga sulmet që tronditën Brukselin ditën e Martë.

Vatikan- Papa Francesku pagëzoi gjashtë shqiptarë në Meshën e Vigjiljes së Pashkëve që u mbajt në Bazilikën e Shën Pjetrit në Vatikan.

Pasi java e shenjtë u errësua disi nga sulmet e Brukselit, Papa Francesku u ka bërë thirrje besimtarëve të krishtërë të mos burgosen nga frika dhe pesimizmi. Në meshën e mbajtur Ati i Shenjtë, i drejtoi mesazhet e tij për 1.2 miliardë besimtarë në mbarë botën.

“Ne do të vazhdojmë që t’i shohim problemin si në brendësi ashtu edhe jashtë tyre, pasi problemet do të jenë gjithnjë pjesë e jetës tonë. Por në këtë mbrëmje është shumë e rëndësishme që të lejojmë dritën e Zotit të depërtojë mbi problemet tona. Le të mos e lejojmë errësirën dhe frikën që të na shpërqëndrojë dhe të na kontrollojë.”

Më tej, Papa Francesku tha se shpresa duhet të triumfojë mbi mërzinë, teksa dënoi edhe veprimet e bëra nga disa militantë të cilët përdorin emrin e Zotit për të justifikuar aktet e tyre të dhunshme dhe të paprecedenta.

Mesha e vigjiljes së Pashkëva gjatë këtij viti u karakterizua nga masat e rrepta të sigurisë. Që prej fillimit të javës, në kryeqytetit e Italisë Romë si dhe në Vatikan ka patur një numër të lartë oficerësh nga policia dhe ushtria.