Parandalimi i korrupsionit, ministri Manja marrëveshje me Agjencinë Kombëtare Italiane Antikorrupsion

Ministri i Drejtësisë, Ulsi Manja dhe Giuseppe Busia, President i Agjencisë Kombëtare Italiane Antikorrupsion kanë zyrtarizuar sot një marrëveshje dypalëshe në Romë të Italisë.

Pala italiane me një eksperiencë të konsoliduar në trajtimin e korrupsionit, do të asistojë Drejtorinë e Përgjithshme të Antikorrupsionit në rrugëtimin drejt shndërrimit në një Agjenci Antikorrupsion në varësi të MD, me fokus të veçantë parandalimin e korrupsionit, duke e shtrirë edukimin për këtë problematikë në të gjitha hallkat e sistemit arsimor të vendit tonë.

Kjo marrëveshje do t’i shërbejë drejtorisë antikorrupsion për trajnimin e kapaciteteve njerëzore me ekspertizën e shkëlqyer që ofrohet nga ANAC. “Do punojmë me moton: Dy agjenci një drejtim. Një marrëveshje shumë e rëndësishme për drejtorinë tonë. Do e shtrijmë procesin e edukimit për këtë problematikë në të gjithë sistemin arsimor”, tha Manja.