Parashikimi i deputetit demokrat për PD zyrtare: Alibeaj merr zero bashki

Deputeti i Partisë Demokratike, Dashnor Sula, pjesë e grupit të Alibeajt, deklaron se PD-ja zyrtare do të marrë zero bashki. Në një intervistë për “Euronews Albania”, Sula tha se e vetmja bashki ku ai dyshon që Alibeaj mund të marrë vota është Mallakastra.

“Për mos të thënë 0, po them 0.5. Vetëm aty dyshoj, në Mallakastër. Vetëm aty mund të ketë një shans, te të tjerat 0, të garantoj për këtë dhe mbaje mend sa keq është kjo punë.

Distancimi im ka qenë për një arsye shumë të thjeshtë sepse, më falni për modestinë, por jam i vetmi deputet parlamentar i opozitës në grupin parlamentar që kam thënë pas 30 prillit kur zoti Berisha bëri Kuvendin dhe Komisioni i Rithemelimit kishte dhe firmën dhe logon e Partisë Demokratike.

I kam kërkuar, 2 rrugë kemi iu kam thënë, zotit Alibeaj dhe të gjithëve. Zotërinj, ne ose do të ngremë një gjë tonën, Partinë Demokratike, pa firmë, pa logo, pa sigël dhe të futemi në zgjedhjet vendore si një forcë politike alternative. Argumenti i Alibeajt dhe i disa të tjerëve aty brenda ishte që ne të mos përçajmë demokratët dhe u la një gjë zvarrë”,-tha Sula.