Pas SHBA-së, Gledis Nano vizitë zyrtare në Athinë: Rrisim forcën parandaluese të krimeve ndërkufitare

Pas vizitës në SHBA, drejtori i Përgjithshëm i Policisë së Shtetit, Gledis Nano është duke zhvilluar një tjetër vizitë pune, këtë herë në Athinë. Nano u prit në një takim miqësor nga homologu i tij, Drejtori i Përgjithshëm i Policisë greke Gjeneral Lieutenant Konstantinos Skoumas.

Gjatë takimit, Nano dhe Skoumas diskutuan çështje me interes më të gjerë policor, duke theksuar nevojën për forcimin e kuadrit të përbashkët strategjik për luftën kundër krimeve të rënda, krimit të organizuar, trafikut të drogës, emigracionit të paligjshëm, si dhe për hetimin e rasteve të vrasjeve.

Nga të dy drejtorët u shpreh vullneti i ndërsjellë për ngritjen e nivelit të bashkëpunimit mes dy vendeve, në çështjet e sigurisë, bashkëpunimit policor, si edhe shkëmbimit të informacionit, por edhe të realizimit të trajnimeve të përbashkëta.

Sipas njofimit, Nano ka theksuar se Policia shqiptare është e mirorientuar dhe e vendosur për të bashkëpunuar me partnerët, në veçanti me vendet fqinje, për të rritur forcën parandaluese dhe goditëse ndaj krimit të organizuar dhe krimeve ndërkufitare.