PD depoziton kërkesë në Apel për vulën, thirrje Rithemelimit: Do ta pranoni vendimin publikisht

Këtë të enjte Indrit Sefa, përfaqësuesi i PD-së së Lulzim Bashës, ka depozituar në Gjykatën e Apelit një kërkesë për nxitjen e shqyrtimit të çështjes që lidhet me vulën e kësaj partie. Ai tha se gjykata duhet të marrë një vendim i pa ndikuar nga asnjë faktor. Një thirrje e pati edhe për Rithemelimin, që të dalë publikisht dhe të deklarojë se vendimin e gjykatës do ta pranojë.

“I bëjmë thirrje nënkryetarit të Parlamentit që ligjshmëria përcaktohet nga rregullat. Drejtësia popullore proletare me numra e shifra ka në Kinë e Korenë e Veriut, janë politika putineske. I bëj thirrje palëve të ndjekin rrugën ligjore që çështja të shqyrtohet në një kohë të shkurtër.

Gjykata të mos ndikohet nga asnjë faktor. Rithemelimi të thotë që çdo vendimmarrje e gjykatës do të respektohet. Një gjë të tillë e kemi bërë edhe ne. Dilni publikisht dhe thoni që do të pranoni vendimin”, tha ai për mediat.