Përgjimet e antimafias, Soko: Lajm shumë i keq! Edhe para 1 viti patëm përfshirjen e mafias në pastrimin e qytetit. Kullat nuk ndërtohen si nevojë

Eksperti i ekonomisë, Pano Soko ka folur për Ora News në lidhje me përgjimet e publikuara, ku mafia italiane është e përfshirë në transaksionet e ndërtimeve në Tiranë.

Soko ka thënë se ky është një lajm shumë i keq për vendin tonë, teksa shton se këto bashkëpunime janë të hershme.

Soko: Vëllimi i transaksioneve është shumë i madh, vëllimi i metrave katrorë është shumë i madh. Të arrihet dhe të jepet 3 mijë metra katrorë për ndërtim, madje për momentin është duke shkuar diku te 4, përmasa është jashtëzakonisht shumë e madhe. Këtu ka një bum, normalisht nëse vendos koificentët përkatës, me një hamendësim timin praktikisht nuk më del që të mbulohet transaksioni i grupeve kriminale shqiptare sado të forta qofshin. Gjithë ky vëllim ekonomik i krijuar, nuk përballohet dot vetëm me paratë e këtyre grupeve.

Indicet kanë qenë që këtu ka pasur ndërhyrje dhe të grupeve kriminale ndërkombëtare me famë si Ndraghetës. Nuk është hera e parë që ata përmenden në historinë shqiptare, pasi vetëm para një viti ne patëm përfshirjen në një tjetër sektor, në pastrimin e qytetit, ku përsëri dolën elementë të përfshirjes së mafias italiane në transaksionet që kryenin njësitë bashkiake në Tiranë. Kjo është një histori e vjetër bashkëpunimi. Është një lajm shumë i keq!

Eksperti i ekonomisë Pano Soko për Ora News ka thënë se kullat në qytetin e Tiranës janë një mënyrë për të pastruar paratë e pista.

Sipas Sokos, kullat po ndërtohen sepse i wshtw gjetur njw burim financimi nga paratw e krimit dhe tw korrupsionit.

Soko: Për sa kohë që kullat nuk ndërtohen se i kërkojnë njerëzit apo bizneset, për sa kohë që numri i bizneseve ngelet po ai dhe nuk ka shtesa në sipërmarrje, nuk ka investime që do të duhet të justifikonin edhe ndërtimin e këtyre kullave, atëherë logjika e pastër të çon në faktin që këto kulla po ndërtohen sot, sepse është gjetur burimi i financimit. Ky burim normalisht që nuk do të vinte nga ekonomia e pastër, por rrjedhimit do të vinte nga një ekonomi e zezë, e krimit dhe korrupsionit. Praktikisht kjo ka qenë edhe spuntoja që gjatë gjithë kohës që është marrë në analizë Bashkia e Tiranës, është folur për lejet e shumta të ndërtimit.

Pavarësisht premtimeve elektorale të Veliajt, në kemi parë që Tirana gjatë këtyre viteve mban numër rekord lejesh ndërtimit qoftë në metra katrorë apo në vëllim ekonomik transaksioni që kanë pasur këto leje ndërtimi. Në thelb këto kulla nuk ndërtohen se ka nevojë për to, por janë parkingje parash të pista. Ky është biznesi që fshihet këtu brenda.