Përplasen tre makina në Elbasan, lëndohet një grua shtatzënë

Tri automjete janë përfshirë në një aksident rreth orës 06:15 të mëngjesit të kësaj të diele. Aksidenti ndodhi në aksin e rrugës kombëtare Tiranë -Elbasan në afërsi të rrethrrotullimit të Bradasheshit.

Raportohet se e dëmtuar lehtë ka mbetur një grua shtatzëne, e cila sipas stafit mjekësor që mbërriti në vendngjarje, fatmirësisht nuk ka asnjë lloj rreziku për shëndetin.

Drejtuesit e të tri automjeteve të cilat u përfshinë në aksident dhe personat e tjerë që po udhëtonin me to nuk kanë pësuar asnjë lloj dëmtimi, ndërsa nuk janë ende të qarta rrethanat dhe shkaqet në të cilat ndodhi.

Policia paraprakisht dyshon për shkeljen e rregullave të qarkullimit dhe parakalim të gabuar të njërit prej automjeteve që qarkullonte nga Elbasani drejt Tiranës.