Pesë deputetë lënë mandatet për të kandiduar në zgjedhjet e 14 majit, ja emrat që i zëvendësojnë

Pesë deputetë kanë dorëzuar mandatin e tyre për të kandiduar në zgjedhjet lokale të 14 majit.

Paraditen e kësaj të hëne dorëzoi mandatin Besjan Ajazi, i cili do të kandidojë në Bashkinë e Gramshit për Partinë Socialiste. Vendin e tij në parlament do ta zërë Shkëlqim Bullari.

Mandatin e dorëzoi edhe Benet Beci, i cili do të kandidojë për Bashkinë e Shkodrës dhe vendin e tij mund ta zërë Ilir Beqja. Po sot, mandatin e dorëzoi Zef Hila, për të kandiduar për Bashkinë e Vaut të Dejës. Mandatin e tij do e marrë Ludovik Hasani.

Ndërkaq, të premten, dorëzuan mandatet dy deputetët e Partisë Demokratike, Belind Këlliçi dhe Luçiano Boçi, të cilët do të zëvendësohen në parlament, respektivisht nga Asllan Dogjani dhe Qamil Xhafa.