Pesë vjet burg vajzës, që aksidentoi të birin e Avenir Pekës

Gjykata dha 5 vite burg për 26-vjeçaren Uarda Çota, pasi u shpall fajtore për aksidentin me pasojë vdekjen e djalit 11-vjeçar të ish-zv. ministrit të Brendshëm, Avenir Peka, ngjarje e ndodhur mbrëmjen e 29 dhjetorit 2014.

Gjykata e Tiranës dha vendimin për 26-vjeçaren Çota pas gjykimit të shkurtuar, kërkuar nga ana e saj.

Prokuroria e Tiranës kërkoi 8 vite burg ndaj saj, për akuzën e shkeljes së rregullave të qarkullimit rrugor. Në përfundim të nëntë seancave të zhvilluara me gjykim të shkurtuar, togat e zeza kryesuar nga Shefkije Demiraj vendosën dënimin e Uarda Çotës me 5 vite burg.

Aksidenti me pasojë vdekjen e 11-vjeçarit ndodhi mbrëmjen e 29 dhjetorit në aksin e Unazës së Re, pranë Kopshtit Botanik në kryeqytet. Nga hetimet rezultoi se shoferja 26-vjeçare Uarda Çota drejtonte një mjet “Mercedez Benz”, në gjendje të dehur dhe me shpejtësi 100 km në orë, nga 40 km që ishte tabela kufizuese.

Pas aksidentit u proceduan penalisht dhe drejtuesit e firmave, që kryenin punime në këtë aks rrugor.