“Po i vjen fundi parisë, po i largohet edhe grupi që i rri afër sepse nuk ka më para”

Armir Shkurti dhe Gridi Rroji kanë folur për emisionin “Fokus” të Robert Papa që transmetohet në Fax News mbi situatën politike në vend, ndryshimet e mundshme ekonomiko-politike etj.

Shkurti përmendi një sërë faktorësh që e bëjnë qeverisjen aktuale sipas tij në shërbim të oligarkëve dhe përgjegjëse e ikjes masive të shqiptarëve nga vendi, ndërsa ka radhitur edhe disa faktorë nga ana tjetër shqetësuese që kanë filluar ta bëjnë kryeqytetin shqiptar sit ë pajetueshëm.

“Është mundësi e rrallë për të folur në media për situatën që ka ndodhur në Shqipëri, pasi na i kanë mbyllur dyer dhe dritaret. Në 1986 Shqipëria numëronte 4 milionë banorë, duhej të ishin 4 milionë por sot diçka më shumë se 2 milionë kanë mbetur. Vetëm vitin e kaluar munguan 100 mijë fëmijë në shkolla. Shqipëria ka problem shpresën, gjendja është një regjim i Edi Ramës që ka kapur të gjitha institucionet, nga opozita në parlament, por edhe opozita jashtë është këmba që e mban Ramën në pushtet. Shqiptarët e kuptojnë se ose duhet të largojnë këtë dyshe ose duhet të presin hyrjen nga jashtë. Për shqiptarët që jetojnë në Tiranë e shikojnë kaosin total, janë ngushtuar rrugët, shtuar ndërtimet, është pesëfishuar popullsia, makinat janë qindra-fishuar. Në vend që të ishin krijuar mundësi për të lehtësuar këtë gjë, është përkeqësuar. Pemët e pyllit orbital na rezultojnë më të shtrenjta se edhe në tregjet e pakicës. Ka ajrin ndër më të ndoturit në rajon. Shtresa e mesme është asgjesuar. Nëse je mik i oligarkëve bën karrierë, ndryshe do të zhdukesh. Pa një lëvizje politike reale jashtë establishmentit, nuk do të ketë asnjë ndryshim”, tha Shkurti.

Ndërsa Gridi Rroji që jeton në Shtetet e Bashkuara të Amerikës e sheh ndryshimin e situatës në Shqipëri të bazuar tek disa faktorë që më tej argumenton se do ta kishin shumë të vështirë punën e tyre për shkak të kontrollit nga ‘paria’.

“Është një rrugë pa krye, me parime kriminale dhe oligarkike që pasurohen dhe kontrollojnë gjithçka, kanë para. Por çdo rrugë e ka një fund dhe çdo udhëtim politik e ka një logjikë, dhe logjika e udhëtimit politik ka ardhur drejt fundit. E vetmja gjë që kërkon kryeministri janë paratë, sepse arka e shtetit ka mbetur bosh. Kësaj parie i ka ardhur fundi i qëndrueshmërisë. Edhe grupi që i rri afër po ngushtohet sepse nuk ka më para dhe kur nuk ka para laku ngushtohet dhe ata largohen. Një zgjidhje e mundshme është nga jashtë, por pa vullnetin e shqiptarëve të huajt nuk mund të vendosin demokracinë. Ka raste historike shumë se nëse njerëzit nuk binden të ndryshojnë rrugë, çdo ndërhyrje e jashtmë është thjesht e pamundur. Tjetër mënyrë është revolucioni, por kjo kërkon njerëz me bindje të thella, por duket e pamundur sepse paria kontrollon gjithçka. Gjithkush që del me axhendë revolucionare, kapet në forma të ndryshme nga paria”, tha Rroji.