Policët duan psikologë, profesion që shkakton gjendje të lartë stresi

Ekspertët kërkojnë monitorim psikologjik për policët e shtetit. Këtë javë një efektiv që pinte qetësues antidepresiv vrau kolegun e tij.

Në Shqipëri trajtimit psikologjik i nënshtrohen vetëm forcat speciale ndër to edhe Renea, ndërsa shumica e trupës së policisë, ato të rendit dhe hetimit të krimeve nuk monitorohen për këtë aspekt.

”Policët duhet të futen jo vetëm në test psikologjik, por edhe psikiatrik. Të mos bëhet test i karakterit formal; të marrë pjesë mjekësia ligjore, por edhe elita e psikologëve dhe psikiatërve”, thotë Artan Rexhepi, ekspert kriminalist.

Testi psikologjik që aplikohet tek forcat speciale, kryhet sa herë që ka dyshime rreth sjelljes së efektivit pas traumave të ndryshme. Ndërsa për pjesën tjetër kryhet vetëm kur pranohen në akademinë e policisë.