Policia blindon vendin, ngrihen 83 pika kontrolli. Në 3 ditë 59 të arrestuar

Policia e Shtetit ka nxjerrë në terren të gjithë forcën e saj, pas ngjarjeve të rënda kriminale në vetëm pak ditë. Shumë vrasje kanë ndodhur ditën e fundit dhe për këtë në të gjithë vendin janë ngritur 83 pika kontrolli si dhe nga këto aksione janë vënë në pranga 59 persona në vetëm tre ditë aksion. Gjithashtu janë ndaluar edhe 14 persona që ishin shpallur në kërkim, për vepra të ndryshme penale, por që kishin mundur t’i fshiheshin policisë. Në anën tjetër, janë shoqëruar për verifikim në komisariate 170 persona, të cilët janë emra të njohur të drejtësisë për precedentët e mëparshëm penal, apo që kanë rezultuar pa dokumente identifikimi me vete.

Në të gjithë vendin janë bllokuar edhe 23 automjete, pasi drejtuesit e tyre nuk kanë pasur dokumentacionet e nevojshme kur janë kontrolluar nga patrullat e policisë, Ky aksion ka përfshirë forcat e rendit, ato Shqiponjat, forcat Renea, Ndërhyrjen e Shpejtë dhe Operacionalen, të cilat janë vendosur kryesisht në rrugët nacionale, në brendësi të qyteteve si dhe në rrugët kryesore të fshatrave. Të përfshirë janë edhe uniformat blu të kufirit.

”Situata e rendit është në parametra optimalë pavarësisht ngjarjeve të fundit. Ngjarjet janë ngjarje por jo të atij niveli sa të përmbysin situatën”, thotë ministri i Brendshëm, Sandër Lleshaj në një kohë që në vend janë shënuar vrasje çdo ditë. Për shqiptarët e vërteta është ndryshe.

Madje ata shprehen se ndihen të rrezikuar teksa ecin në rrugë. Vrasje për larje hesapesh, pazare droge, hakmarrje apo luftë për pronë që shoqëruan përditshmërinë e shqiptarëve vetëm në javën e fundit kanë rritur frikën dhe pasigurinë. Policia e Shtetit thotë se operacioni vijon dhe se fton qyetarët që të denoncojnë në numrin 112 e në Komisariatin Dixhital çdo paligjshmëri duke ju garantuar anonimat të plotë dhe reagim të menjëhershëm e të paanshëm.

Njoftimi i plotë

Në të gjithë vendin ka vijuar zbatimi i detyrave të përcaktuara në Planin e masave për mbajtjen nën kontroll të situatës kriminale dhe rendit publik, parandalimin dhe goditjen e veprimtarisë kriminale, kapjen e personave në kërkim, personave që mbajnë armë pa leje, atyre me tendencë në krimet kundër personit etj.

Në zbatim të planit operacional janë angazhuar të gjitha Drejtoritë Vendore të Policisë, forca e posaçme “Shqiponjat”, FNSH-ja, RENEA dhe Drejtoria e Forcës së Posaçme Operacionale në Policinë e Shtetit dhe strukturat e Policisë Kufitare.

Në të gjithë vendin, janë ngritur 83 pika kontrolli në akset rrugore nacionale, në brendësi të qyteteve dhe në akset kryesore rurale, si dhe janë shtuar patrullimet në kufirin jeshil dhe atë blu. Janë ushtruar kontrolle në lokale, banesa, ambiente të ndryshme dhe vende të dyshuara për fshehje apo përdorim të lëndëve narkotike.

Si rezultat i kontolleve janë sekuestruar tre armë të ftohta dhe disa doreza metalike e shkopinj bejzbolli që i mbanin drejues mjetesh me vete, si dhe sasi të vogla lëndë narkotike kanabis e doza me heroinë e kokainë. Në të gjithë vendin janë arrestuar në flagrancë 29 shtetas, janë proceduar penalisht 6 të tjerë, si dhe janë ndaluar 2 shtetas të shpallur në kërkim, për vepra të ndryshme penale.

Po gjatë kontrolleve, janë shoqëruar për verifikim në ambientet e Komisariateve të Policisë në të gjithë vendin 79 persona me precedent penal të mëparshëm dhe pa dokument identifikimi me vete. Si dhe janë bllokuar për mungesë dokumentacioni 23 automjete në gjithë vendin. Operacioni vijon. Policia e Shtetit fton qyetarët që të denoncojnë në numrin 112 e në Komisariatin Dixhital çdo paligjshmëri duke ju garantuar anonimat të plotë dhe reagim të menjëhershëm e të paanshëm.