Portieri armen: Ndeshje e trukuar? “Luftë” shqiptaro-serbe!

Portieri i Armenisë, Gevorg Kasparov ka hedhur poshtë të gjitha aludimet e mediave serbe për trukimin e mundshëm të ndeshjes Armeni-Shqipëri,  duke deklaruar se nuk ka ndeshje të trukuar, por thjesht një problem mes shqiptarëve dhe serbëve.

“Ka zëra që komentojnë në lidhje me këtë çështje duke hedhur akuza të pakuptimta, por nuk ka asgjë të vërtetë. Një gjë e tillë është bërë objekt mediatik dhe mediat online, si shqiptare edhe ato serbe kanë nisur një ‘luftë’ mes tyre. Duket qartë se ata kanë probleme me njëri-tjetrin dhe na kanë vënë ne në mes. Kjo është një gjë pa kuptim dhe unë nuk kam çfarë t’ju them më”, ka pohuar ai.

Më tej, Kasparov shton se “takimi nisi shumë keq për Kombëtaren tonë dhe mua më dukej sikur pas çdo gabimi të vogël që bënim mund të ndëshkoheshim".

"Është e vërtetë që kemi pësuar tre gola dhe janë shumë, por nuk duhet të harrojmë se edhe ndaj Francës kemi pësuar katër të tillë, pra në dy ndeshjet e fundit kemi pësuar shtatë gola dhe kjo nuk është ndonjë gjë e çuditshme”, vijoi futbollisti armen.