Prekjet nga Covid-19, shumica vatra familjare

Kjo është dita e tretë që rastet e reja shkojnë mbi 1 mijë. Rritjen e ndjeshme të infektimeve të ditëve të fundit, epidemiologët e shohin më së shumti në vatra familjare, por nuk mungojnë bizneset dhe institucionet. ”Rastet janë shtuar goxha, grupmosha është relativisht e re. Më tepër janë raste të vatrave familjare. Edhe rastet e vatrave institucionale po ndiqen nga grupet e terrenit”.

Shumica e vatrave familjare janë në Tiranë, qytet i cili mban edhe numrin më të lartë të të infektuarve me afro 18 mijë raste aktive Covid-19. E ndjekur më pas nga Fieri me 3 mijë raste, Durrësi dhe Shkodra me afro 2 mijë raste. Epidemiologët thonë se nuk mungojnë edhe rastet e riinfektimit.

”Një rast mashkull ishte në moshën 45-vjeç, kurse një rast femër ishte 38-vjeç. Në muajin nëntor këta dy persona kishin rezultuar pozitivë. Si rasti i parë, ashtu edhe rasti i dytë kanë shfaqur përsëri simptoma të ngjashme me herën e parë, por e kalojnë më lehtë”. Sipas epidemiologëve rastet e riinfektimit kanë kaluar pa komplikacione të rënda dhe me simptoma të lehta.