Presidenti dekoron ambasadoren Rosemary Di Carlo dhe rabinin Artur Schneier

Nё vijim tё vizitës tё tij në Nju-Jork, Presidenti i Republikës, Sh.T.Z. Bujar Nishani në prani të diplomatëve amerikanë, personaliteteve të ndryshme politike, akademike dhe shoqërore të Nju-Jorkut, dekoroi Ambasadoren amerikane Rosemari A. Di Carlo me Dekoratën “Gjergj Kastriot Skënderbeu” me këtë motivacion: 

“Në shenjë vlerësimi dhe mirënjohjeje të thellë për kontributin e saj të spikatur politik dhe diplomatik në thellimin dhe forcimin e marrëdhënieve historike dhe tradicionale amerikano-shqiptare si dhe për përparimin e çështjes shqiptare, sidomos të fitimit të mëvetësisë së Kosovës”, si dhe rabinin Arthur Schneier me Dekoratën “Për merita të veçanta civile”: 

“Në shenjë vlerësimi për kontributin dhe punën e tij të palodhur e të pakursyer çerekshekullore në favor të paqes, mirëkuptimit dhe tolerancës, në mbrojtje të çështjes shqiptare dhe farkëtimit të lidhjeve historike, dhe bashkëpunimit mes shqiptarëve dhe hebrenjve.”