Presidenti Meta: Largimi i trurit dhe rinisë, plagë e madhe për vendin. Të ndalim shpopullimin tani!

Presidenti i Republikës, Ilir Meta, ka reaguar lidhur me raportin e Institutit për Studime Ekonomike Ndërkombëtar në Vjenë, që e rendit Shqipërinë ndër vendet me rrjedhjen më të lartë të trurit në rajon.

Kreu i Shtetit thotë se largimi i rinisë është një plagë e madhe për vendin, ndaj ky fenomen duhet të ndalet sa më parë.

“Shqipëria ka nevojë për “fitim të trurit” dhe jo “ikje të trurit”, shkruan Presidenti Meta.

Mesazhi i plotë i Presidentit Ilir Meta

Largimi i trurit dhe i rinisë është një plagë e madhe për vendin.
Një tjetër institucion prestigjoz, Instituti për Studime Ekonomike Ndërkombëtare i Vjenës, bën me dije se fenomeni i shpopullimit në Shqipëri, gjatë viteve të fundit është përkeqësuar sidomos me largimin e grupmoshave 20-24 vjeç.
Studimi vëren se nga 105 mijë qytetarë që ikin nga Shqipëria, 40,700 persona janë të arsimuar ose 40 për qind e totalit.
Largimi i trurit dhe i forcave të reja dhe më krijuese të shoqërisë duhet ndalur sa më parë.
Të rinjve tanë u duhen ofruar më shumë shpresë, alternativa edukimi dhe punësimi, ndërsa të arsimuarve më shumë shanse të barabarta, vlerësim meritokracie dhe vende pune, ku të shfaqin talentin dhe potencialin e tyre intelektual.
Shqipëria ka nevojë për “brain gain” dhe jo “brain drain”!
KOHA PËR TË NDALUR SHPOPULLIMIN ËSHTË TANI! 🇦🇱