Projektligji/Burgje private për të dënuarit me më pak se 5 vite

Nisur nga mbipopullimi i institucioneve të vuajtjes së dënimit por dhe i problematikave të tjera të evidentuara në sistemin peniteciar, qeveria ka miratuar në mbledhjen e ditës së mërkurë projektligjin për të drejtat dhe trajtimin e të dënuarve me burgim dhe të paraburgosurve. Ngritja e institucioneve të ekzekutimit të vendimeve penale private parashikohet në nenin 15 të projektligjit të qeverisë, ku citohet se: ”Institucionet e ekzekutimit të vendimeve penale janë publike dhe private. Këshilli i Ministrave përcakton rregullat për funksionimin, administrimin, kontraktimin, si dhe rregullat që përcaktojnë elementet e sigurisë në institucionet private të ekzekutimit të vendimeve penale”. Në nenin 16 të këtij projektligji sanksionohet që në institucionet private nuk mund të vuajnë dënimin personat e dënuar me më shumë se 5 vite heqje lirie. ”Të dënuarit për të cilët është vendosur masa e dënimit deri në 5 vite burgim mund të vendosen në institucionet private të ekzekutimit të vendimeve penale. Të dënuarit që me vendim gjykate janë caktuar në institucionin e sigurisë së lartë, nuk vendosen në institucionet private të ekzekutimit të vendimeve penale”.