Prokurori i çështjes “Tahiri” në vetting, zbulohet pasuria e tij

Dritan Prençi, prokurori i Krimeve të Rënda do të dalë para Komisionit të Pavarur të Kualifikimit.

Seanca në ngarkim të tij është parashikuar të mbahet më 5 qershor, në ora 11.30, ku do të dëgjohet argumentimi i pasurisë së tij.

Prençi është një ndër prokurorët që po heton çështjen në ngarkim të ish-ministrit të Brendshëm, Saimir Tahiri, si dhe të Orest Sotës, i cili u kap me një shumë të konsiderueshme parash dhe me patentën e ish-ministrit të Brendshëm.

Sa i takon pasurisë, në vitin 2008 ai ka deklaruar blerjen e një apartamenti 78 m2 dhe vlerë thuajse 32 mijë euro, të blerë me kredi bankare për shlyerje në 10 vjet.

Tre vite më vonë ai ka deklaruar një tjetër kredi 8-vjeçare, me anë të së cilës ka shlyer një pjesë të shumës për blerjen e apartamentit.

Por prokurori ka deklaruar edhe një makinë tip “Volkswagen”, me vlerë 2 mijë euro.