Prokuroritë marrin lejet e ndërtimit pas viteve 90 dhe 2000

Prokuroria e Durrësit dhe e Tiranës, prej disa ditësh kanë nisur hetimet pas shembjeve të pallatave nga tërmeti tragjik i 26 nëntorit. Dyshimet kryesore në Durrës janë se pasojat e tërmetit, kanë ardhur si shkak i ndërtimeve pa leje dhe të moskryerjes së detyrës nga inxhinierët zbatues dhe personave përgjegjës. Pjesë e hetimit pritet të jenë shumë banorë që pretendojnë të jenë pjesë e procesit hetimor.

Pyetja e tyre nga prokuroritë prite të behët në një fazë të dytë. Një grup prokurorësh po verifikon organet qe kanë miratuar lejet e ndërtimit dhe nëse ato janë zbatuar siç duhet nga ndërtuesit. Prokuroria e Tiranës ka kërkuar informacione paraprake Bashkisë së Tiranës për banesat me dëme dhe të klasifikuara jo në kushtet e duhura për banim. Në Krujë organi i akuzës nuk ka regjistruar procedim, por nga ana tjetër në terren janë marrë të gjitha provat e mundshme.

Prokurorët dhe oficerët gjyqësore ishin në Thumanë, ku u shembën tre pallate, e ku humbën jetën 24 persona. Ata kanë kryer të gjitha veprimet për mbledhjen e provave. Verifikimi është shtrirë edhe në shumë shtëpi e objekte të tjera të dëmtuara. Në cilësinë e provës materiale janë marrë mbetje të ndërtesave, si dhe janë siguruar edhe kopje të raportit të grupeve të konstatimit të dëmeve.