Protestat për Klodianin, Hajdari: S’e pranoni revoltën e të rinisë, po iu thyhen kockat. Ju bëni hare

Deputetja Rudina Hajdari, në fjalën e saj në seancën Parlamentare, ka dënuar qëndrimin e qeverisë për protestat e ndodhura pas vrasjes së të riut Klodian Rasha nga Policia e Shtetit. Ndër të tjeta ajo theksoi se të rinjtë në këtë vend janë të revoltuar për mënyrën sesi trajtohen dhe se nuk kanë asnjë mundësi që të ecin përpara. Hajdari tha se të rinjtë kanë ëndërr që të bëhen trafikant droge, pasi në këtë mënyrë dalin nga varfëria.

”Kam shpenzuar kohë nëpër protesta dhe kam folur me të rinjtë. Pasiguria e tyre pambrojtja që u bëhet të rinjve është në një pikë e vështirë që shteti shqiptar nuk është në mbrojte të këtyre të rinjve. Ata të rinj që dolën në shesh ishin të revoltuar dhe janë të revoltuar. Qeveria i quan të rinjtë haplabakë, rrugecër, kokëpalarë, si njerëzit që po e dëmtojnë këtë vend. Janë ata të cilët u kërkojnë votën këtyre të rinjve e për ti çuar këto lekë në koncesione. Si mos të revoltohen kur nuk kanë asnjë mundësi për tu punësuar e për të marrë një rrogë të thjeshtë. Si mos të revoltohet që prindërit nuk u blejnë dot libra, nuk i çojnë dot nëpër shkolla të mira, kur nuk ka asnjë perspektivë përpara, asnjë shans të eci përpara, kur këtu mbizotëron paraja. Kur shikon njerëz në parlament që juve prej 30 vitesh hani darka të shtrenjta, keni shtëpi nëpër kodrina, nuk e zbatoni ligjin, e shkelini sa herë ju duhet ndërkohë të rinjtë shqiptarë nuk e kanë këtë shans, atyre u thyhet kockat nga arroganca juaj që qëndron pas policit. Juve nuk e pranoni revoltën e tyre sepse i bie të pranoni dështimin tuaj. Jam shumë e sigurt që drejtësia do të vijë”, tha Hajdari.