PS-ja fitoi në Rrogozhinë me votat e të burgosurve, PD: Beteja do vijojë në rrugë ligjore

92 vota nga të burgosurit në Rrogozhinë janë dhënë për PS-në, 12 për koalicionin “Bashkë Fitojmë” dhe 4 vota kanë qenë të pavlefshme.

Edison Memolla nga Partia Socialiste ka marrë 5120 vota, ndërsa Shkëlqim Hoxha nga koalicioni “Bashkë Fitojmë” 5097 vota. Diferenca e votave ka qenë shumë e vogël, ku Hoxha ka humbur Bashkinë për vetëm 23 vota më pak. Pikërisht për këtë, në një deklaratë dega e PD-së shprehet se do të vazhdojë betejën në rrugë ligjore për çdo votë të qytetarëve.

‘‘Ne jemi fitues moral të Bashkisë por dhe ai real pasi e mbyllëm Bashkinë me rezultatin 57-vota përpara, kundërshtari jonë që festoi parakohe arriti të ngrejë kokën dhe jo të buzëqeshë vetëm me një kuti atë të Burgut Rrogozhinë ku nuk dihet realiteti i këtij rezultati”.

Deklaratë e plotë

Të nderuar Qytetarë të Bashkisë Rrogozhinë që me votën tuaj vendosët për ndryshimin e drejtimit të Bashkisë Rrogozhinë!

Të nderuar demokratë që punuat pa u lodhur, miq dhe vëllezërit tanë emigrantë që dhatë kontributin tuaj të jashtëzakonshëm, në këtë rezultat epik që u arrit në Bashkinë Rrogozhinë.

Ne jemi fitues moral të Bashkisë por dhe ai real pasi e mbyllëm Bashkinë me rezultatin 57-vota përpara, kundërshtari jonë që festoi parakohe arriti të ngrejë kokën dhe jo të buzëqeshë vetëm me një kuti atë të Burgut Rrogozhinë ku nuk dihet realiteti i këtij rezultati?

Falënderimet tona pafund për të gjithë ju, mos u dekurajoni se betejën tonë do ta vazhdojmë në rrugë ligjore për çdo votë që ju kontribuat me gjithë zemër.