Pse Italia po goditet pa mëshira nga virusi? Mjeku shqiptar jep disa arsye

Pandemia e Covid-19 po tregohet më e egër me Italinë por mjeku shqiptar Julian Balla, i cili punon në Breshia, dha lajmin e mirë se situata është drejt përmirësimit në shtetin fqinj. “Provinca e Breshias ka qenë një nga më të prekurat edhe pse në media është trumbetuar më shumë Bergamo, diferenca është diku te 100 pacientë që kanë ndërruar jetë. Fatmirësisht, prej 4 ditëve, numrat janë në rënie, kjo na e ka lehtësuar disi punën dhe tashmë presioni ka filluar disa të bjerë. Vetëm një ditë më parë, në Breshia kanë dalë nga spitali mbi 300 persona të shëruar”,,-tha për “A2cnn”.

12,428 viktima dhe 105,792 të prekur, e ka Italinë vendin e parë në botë për numër të viktimave dhe Balla jep disa arsye të mundshme që kanë sjellë këtë tragjedi, nga testet e pakta te mosha e lartë e popullsisë.

“Kam qenë kritik sa i përket menaxhimit të tamponëve. Tamponi në masë nuk është aplikuar dhe kjo ka sjellë edhe më shumë të vdekur. Numri i lartë i viktimave i referohet edhe faktin se në të gjithë Italinë janë të shtruar rreth 4 mijë pacientë në terapi intensive. Italia ka një moshë shumë të vjetër, është edhe populli që ka një përqindje shumë të lartë të sëmundjeve. Pjesa më e madhe e pacientëve kanë 3 apo 4 patologji shoqëruese. Të gjitha këto kanë ndikuar në këtë tragjedi”.

Një apel mjeku e ka edhe për qytetarët. “Ju lutemi qëndroni në shtëpi. Nuk ka asnjë sistem shëndetësor që mund të përballet me një krizë të tillë. Vetëm karantinimi mund ta luftojë këtij virus”.