Pse po ikën rinia shqiptare drejt Gjermanisë? Humbja e shpresës po i largon

Mungesa e shpresës është shkaku që shtyn rininë shqiptare drejt emigrimit, fenomen i cili po i kushton shtrenjtë vendit.

“Një i ri në moshën time ikën nga Shqipëria për arsyen se nuk ka vende pune, një nuk ka të ardhme, nuk ka asnjë gjë për të qëndruar shqiptari në Shqipëri”, kështu thotë Arditi për “A2 CNN”, ndërsa u pyet përse kishte zgjedhur të largohej nga vendi.

Arditi nuk po ikën vetëm. Atë e shoqëron, e fejuara e ashtu çift ata shpresojnë të vijojnë jetën në Gjermani. Ervini nga Pogradeci është një tjetër i ri që largohet drejt Gjermanisë, “për të provuar” fatin siç thotë vetë ai. Ashtu si Arditi, edhe ai shoqërohet nga e fejuara.

Lulzim Sali prej tre vitesh është larguar drejt Gjermanisë. Ai nuk është kthyer për të qëndruar, por tashmë mund të marrë edhe familjen e tij me vete.