Punonjësi i Bashkisë Mallakastër arrestohet për goditje me gurë në kokë ndaj efektit të FNSH

Një punonjës i Bashkisë së Mallakastrës është arrestuar nga policia, pasi u bë protagonist i protestës së djeshme të opozitës në Fier, ku u tentua të bllokohej kryeministri Edi Rama. Mësohet se i arrestuari ka goditur efektivin e FNSH-së, Aranit Karemani me gur në kokë gjatë protestës së djeshme të zhvilluar në Fier.

“Rreth orës 13:10 u kap dhe u arrestua shtetasi P.I, 56 vjeç, banues në Ballsh (me detyrë inspektor mjedisi në Bashkinë Mallakastër). Në vijim të veprimeve të kryera, policia e Fierit ka proceduar penalisht në gjendje të lirë edhe 10 shtetas, si edhe janë shpallur në kërkim dhe po punohet për kapjen e 2 shtetasve të tjerë”, njofton policia.

Personi në fjalë u arrestuar pas analizimit të pamjeve filmike dhe provave të tjera të mbledhura në vendngjarje. Materialet i kaluan Prokurorisë pranë Gjykatës së Shkallës së Parë Fier për veprat penale “Kundërshtim me dhunë i punonjësit të policisë së rendit publik”, “Goditje për shkak të detyrës” dhe “Organizim dhe pjesëmarrje në grumbullime dhe manifestime të paligjshme”.