Qeset plastike, Klosi: Gjoba për shkelësit e ligjit, kontrolle të patolerueshme

Ministri i Mjedisit, Blendi Klosi ka zhvilluar një takim me kryeinspektorët e mjedisit dhe monitoruesit pas hyrjes në fuqi të vendimit për heqjen nga tregu të qeseve plastike. Klosi ka thënë se inspektoratet e Mjedisit në rrethe duhet të zhvillojnë kontrolle për të parë nëse masat po zbatohen nga bizneset. Ministri theksoi se nëse masat nuk zbatohen, atëherë gjobat do vendosen si për bizneset e mëdha edhe për supermarketet dhe pikat e vogla të shitjes.

”Qeset plastike përbëjnë ndotjen më të madhe. Këto masa janë për importuesit e mëdhenj, po nuk përjashtohen supermarketet. Do ushtrojmë kontrolle të patolerueshme në të gjithë sektorët e prodhimit. Ispektoriati ka detyrë parësore evidentimin dhe zbatimin e këtyre masave. Aleati ynë më i madh janë qytetarët. Ky mekanizëm është reaksion qytetar dhe refuzimi i qytetarëve për përdorimin e qeseve. Gjobat variojnë nga 100 mijë lekë deri në 150 mijë lekë. Ky aksion ka vlera kombëtare për vendin tonë”,-tha Klosi.

Më tej, fjalën e ka marrë zëvendës ministrja Ornela Çuçi, e cila ka thënë se arsyeja e këtij vendimi është sepse qeset e holla plastike janë të pagjurmueshme duke pamundësuar riciklimin e tyre.

”Doja të kaloja në disa specifikime teknike. Qeset plastike përbëjnë 5% të ndotjes, por është problemi më i madh që hasen nga bashkitë. Nuk gjurmohen dot, për t’u ricikluar, prandaj kemi mbërritur në këtë konkluzion”,-tha Çuçi.