Qeveria ashpërson ligjin, ministrja: Do të rriten me 30% gjobat për personat që ndotin mjedisin

Ministrja e Turizmit dhe Mjedisit, Mirela Kumbaro bëri të ditura vendimet e miratuara gjatë mbledhjes së sotme të qeverisë.

Ministrja bëri me dije se është marrë vendimi për ndryshimin e 4 ligjeve në fushën e mjedisit, ku parashikohen ashpërsime të masave administrative për personat që ndotin mjedisin.

“Miratuam disa vendime të rëndësishme. Ndryshimin e katër ligjeve në fushën e mjedisit, ligjin për mbrojtjen e cilësisë së ajrit në mjedis, ligjin për mbrojtjen e mjedisit, ligjin për mbrojtjen e biodiversitetit dhe ligjin për vlerësimin e ndikimit në mjedis. Ndërhyrja vjen si pasojë e disa situatave. Në radhë të parë i referohem rezultateve të Këshillimit kombëtar të bërë një vit më parë, ku pyetjes “a duhen ashpërsuar masat për mbrojtjen e mjedisit”, pjesëmarrësit ju përgjigjën me mbi 70 % “Po.” Kjo bëri që ministria e Turizmit dhe Mjedisit të rishikonte gjithë paketën ligjore ku parashikoheshin prej vitesh masa administrative për kundërvajtësit por edhe në respekt të parimit “ndotësi paguan”. Masat administrative, gjobat janë jo thjesht penalizmi dhe ndëshkimi, por edhe pjesë edukimi. Prandaj të gjitha masat ndëshkimore do të rriten me 30%”, tha Kumbaro.