Qeveria: Ja pse u shty me 2 vite afati ligjor i bonove të privatizimit

Pak ditë më parë, qeveria shqiptare ndërmori shtyrjen e afatit ligjor të vlefshmërisë së bonove të privatizimit deri në fund të vitit 2020. Kjo është shtyrja e 7 e afatit të përdorimit të tyre. Në nismën e depozituar në Kuvend, qeveria jep arsyet duke shpjeguar domosdoshmërinë e marrjes së një vendimi të tillë.

“Meqenëse në procesin e privatizimit të pronës shtetërore vazhdon të mos jenë përfshirë ende një numër i konsiderueshëm objektesh, kryesisht në administrim të Ministrisë së Mbrojtjes, Ministrisë së Brendshme, Ministrisë së Bujqësisë dhe Zhvillimit Rural apo dhe të organeve të pushtetit vendor etj., si dhe duke gjykuar se shumë prej këtyre objekteve shtrihen në pronat e ish-pronarëve të njohur apo kthyer me vendime të kthimit dhe kompensimit të pronave, mendohet se duhet të vazhdojnë lehtësirat për ish-pronarët, duke e likuiduar një pjesë të vlerës së këtyre objekteve në rast parablerjeje me bono privatizimi (lekë privatizimi). 

Llogaritja e aksioneve për punonjësit në shoqëritë aksionare, ku punonjësit e këtyre shoqërive përfitojnë aksione në këmbim të bonove të privatizimit, e bën të domosdoshme shtyrjen e afatit të përdorimit të bonove të privatizimit (lekë privatizimi).

Gjithashtu, përdorimi i bonove të privatizimit dhe i lekëve të privatizimit në procesin e legalizimit të ndërtimeve pa leje nëpërmjet ALUIZNI-t, ndërkohë që ky proces është në vazhdimësi dhe vazhdojnë të jenë në proces legalizimi një numër i konsiderueshëm objektesh apo banesash, gjykohet se edhe ky proces e bën të domosdoshëm shtyrjen e afatit të përdorimit të bonove të privatizimit dhe lekëve të privatizimit”- shkruhet në relacion.

Më tej, relacioni evidenton se gjatë tri viteve të fundit, në procesin e privatizimit të pronës shtetërore me të drejtën e parablerjes për ish-pronarët e truallit dhe për subjektet me kontratë enfiteoze apo qiraje, rezulton të jenë arkëtuar rreth 705 000 000 (shtatëqind e pesë milionë) lekë bono privatizimi.

Shtyrja për herë të 7 afatin e bonove të privatizimit

Prej vitesh qeveria shqiptare ndjek praktikën e shtyrjes së afatit të përdorimit të bonove të privatizimit.

Shtyrja më e fundit e zyrtarizuar ishte ajo e shkurtit të vitit 2017 që parashikonte si afat përdorimin e tyre deri në fund të vitit 2018.

Por sërish, qeveria ka propozuar në Kuvend një afat tjetër, duke zgjatur vlefshmërinë ligjore të tyre. Referuar vendimit të Këshillit të Ministrave, afati i përdorimit të bonove dhe lekëve të privatizimit është deri më 31.12.2020. kjo rezulton të jetë shtyrja e 7-të e afatit ligjor të tyre.

Në verën e vitit 1995, Këshilli i Ministrave filloi emetimin dhe shpërndarjen e bonove të privatizimit, si pjesë e programit të privatizimit masiv.

Afati i tyre ishte viti 1999.  Shtyrja e parë e afatit u bë në vitin 2006 dhe pothuajse Çdo 2 vite ka shtyrje të afatit të përdorimit të tyre me 1 apo 2 vite.

Bonot e privatizimit përdoren në procesin e legalizimit të ndërtimeve informale e në privatizimin e ndërmarrjeve publike.

Referuar ligjeve në fuqi, ish- pronarët e truallit në rastin e privatizimit gëzojnë të drejtën e parablerjes dhe 80 % të vlerës mund ta paguajnë me bono apo lekë privatizimi.

SCAN