“Qiraxhinjtë” e Kuvendit, zonat e preferuara të politikanëve që marrin 340 dollarë çdo muaj

Nëse jetoni në Tiranë e kuptoni problematikën e vuajtjeve për të gjetur një shtëpi me qera. Në një qytet ku ende nuk ka një rregullatar për çmimet e zonave, disa prej banorëve të kryeqytetit e kanë më te lehtë se të tjerët që të gjejnë një apartament për të jetuar. Bëhet fjalë për deputetët e Kuvendit të Shqipërisë, ku disa prej tyre edhe pse janë pronarë të disa shtëpive dhe bizneseve sërish “fusin dorën” në buxhetin e shtetit.

20 deputetë vijojnë të marrin çdo muaj rreth 340 USD për rimbursim të qerasë së banesës në Tiranë, ndonëse jetojnë këtu prej vitesh. Mes tyre nuk janë vetëm deputetët e rinj që vijnë nga qarqet e tjera përveç Tiranës por edhe personazhe që më herët kanë pasur poste te rëndësisshme në qeveri. Një prej personazheve që jetojnë me qera është ish-zv.kryeministrja Senida Mesi, megjithatë nuk mungojnë as socialistë të tjerë.

Qiraxhinjtë” e Kuvendit janë: Eugen Bojaxhiu, Selami Jenishehri, Senida Mesi, Ediola Braha, Nimet Musaj, Kostaq Papa, Luan Harusha, Enada Kapllani, Arlind Çacani, Edmond Leka, Xhevi Bushaj, Halil Jakimi, Edlira Bode, Fadil Nasufi, Fatmir Velaj, Fatjona Dhimitri, Nikolin Staka, Vasil Sterjovski, Ervis Meço dhe Artemis Dralo. Ndërsa ndryshe nga kolegët e tij deputeti Artur Roshi ka marrë gjatë muajt korrik 2020 një pagesë prej 3 mijë lekësh për fjetje në hotel.

Të gjitha shpezimet e mësipërme nuk përfshihen në pagën bazë prej 156,770 lekëve në muaj. Dosja.al është intersuar personalisht për zonën ku jetojnë dhe çmimin që duhet të paguajnë çdo muaj përfaqësuesit e Kuvendit dhe ka telefonuar disa prej tyre. Disa prej tyre i janë përgjigjur interesimit tonë.

Deputeti Halil Jakipi u shpreh se gjithë shumën e përfituar e shpenzon për shtëpinë me qera, por ka preferuar të mos e tregojë zonën (çështje privatësie). Ndërsa deputeti tjetër i opozitës, Arlind Çarçani tha se kishte zgjedhur zonën e Astirit për të jetuar dhe paguan të njëjtën shifër, edhe pse banesa e tij ndodhet në periferi të Tiranës. Mesa duket edhe pagesa që marrin, e cila është mbi pagën minimale, sërish krijon probleme për gjetjen e një banese. Ndoshta ka ardhur koha për një ligj rregullues, ku shtëpia në periferi të mos kushtojë sa ajo tek “Sahati”.