Qytetarët kanë frikë: Urbanet, lokalet e marketet kanë risk të lartë

Transporti i shërbimit urban, marketet dhe lokalet shihen si ambientet me riskun më të lartë të infektimit me Covid-19. Vendimi i Komitetit të Ekspertëve për të mos lejuar grumbullimet masive me më shumë se 10 persona kanë rritur vigjilencën te qytetarët për frekuentimin e këtyre ambienteve.

Rrezet e ngrohta të nëntorit për qytetarët nuk mund të kalohen pa i shijuar me një kafe. Mbyllja e orarit të punës deri në orën 22:00 ka bërë që pronarët e lokaleve të shtojnë edhe disa tavolina më tepër në ambientet e tyre dhe kur shkelet distanca, veprimi duhet të vijë nga autoritetet shtetërore.

Dyndja e mëngjesit dhe pasdites nga qytetarët që shkojnë dhe kthehen nga puna vijon të jetë e lartë në urbane. Respektimi i masave kalon në plan të dytë, por në kufizimet e fundit të Komitetit nuk u pa i arsyeshëm pezullimi i transportit publik. Qytetarët thonë se shtimi i rasteve me Covid-19 ka bërë që të kujdesen më shumë për distancë veçanërisht ndaj ambienteve me risk të lartë.