Ra nga 2 metra lartësi në takimin e Ramës, gardisti operohet te Trauma (EMRI)

Kryeministri Edi Rama ka qenë sot në bashkitë e qarkut të Elbasanit në kuadër të turit për Llogaridhënien Publike. Përveç protestuesve të opozitës, të cilët me pankarta në duar e kanë ndjekur në të tre qytetet, takimi i Ramës në Belsh është shoqëruar nga një incident i papritur.

Pak minuta pas mbarimit të takimit të kryeministrit me qytetarët, një punonjës i Gardës së Republikës që shoqëron Ramën është rrëzuar aksidentalisht nga podiumi duke u lënduar.

Raportohet se efektivi i Gardës është Mirian Bajramaj, 32 vjeç. Ai ka rënë nga një lartësi 2 metër, duke bërë që fillimisht të dëgjohet një zhurmë e fortë nga qytetarët, të cilët më pas kanë parë efektivin përtokë.

Punonjësi i Gardës është transportuar fillimisht me urgjencë në qendrën shëndetësore në Belsh dhe më pas është transferuar në Qendrën Spitalore të Traumës në Tiranë.

Pasi është sjellë me urgjencë në Tiranë, i riu është futur menjëherë në sallën e operacionit ku po i nënshtrohet një ndërhyrjeje kirurgjikale.

Mësohet se efektivi i gardës ka pësuar dëmtime fizike të konsiderueshme.