Radhë kilometrike në Muriqan
Qindra automjete kanë krijuar një radhë të gjatë 2 kilometra, në pikën e kalimit të Muriqanit, në pritje për të kaluar kufirin shqiptar.
Shkak është bërë ndryshimi i procedurave të punës nga policia malazeze. Nga “të përshpejtuar”, procedura është ndryshuar në “normale”, që parashikon regjistrimin e çdo personi që hyn në territorin malazez.
Qytetarët që po qëndrojnë në radhë janë kryesisht shtetas kosovarë, që udhëtojnë drejt Zvicrës, të cilët shprehen të shqetësuar për pritjet e gjata.
Që nga orët e para të mëngjesit e deri në ato të pasdites së të shtunës, kufirin shqiptar e kanë kaluar rreth 2.500 automjete.
Për të përballuar fluksin e udhëtarëve pala shqiptare ka hapur të katër sportelet, si dhe ka shtuar numrin e punonjësve të policisë në to.
Ndërkohë, radha pritet të bëhet edhe më e gjatë me kalimin e orëve, pasi 2 janari është dhe dita kur të gjithë kthehen në vendet ku kanë emigruar për t’iu rikthyer punës/