Rajoni më pak miqësor me biznesin/ “Doing Business”, Kosova dhe Maqedonia e Veriut bien, vetëm Serbia ngjitet

Vendi ynë nuk është i vetmi që është përkeqësuar në renditjen e “Doing Business” të Bankës Botërore, por është padiskutim ai me rënien më të madhe. Mes vendeve të rajonit, edhe Kosova, Maqedonia e Veriut dhe Bosnje Hercegovina kanë pësuar rënie në renditje, ndërkohë që Mali i Zi nuk e ka ndryshuar renditjen ndërsa Serbia e ka përmirësuar.

Kosova ka humbur ndjeshëm pozicione, duke zbritur nga  vendi i 44-të vjet, në të 57-tin sot, pra përkeqësim me 13 pozicione. Kosova renditet në vendin e 4-të në rajon në lehtësinë e të bërit biznes. Maqedonia e Veriut ndërkohë duket se është vendi më i mirë në rajon, e ndër të parët në botë në këtë drejtim. Por, pavarësisht kësaj, këtë vit ka pësuar një rënie në renditje, nga vendi i 10-të në të 17-tin. Në vend të dytë ndjek Serbia, e renditur e 44-ta, nga vendi i 48-të i një viti më parë.

Mali i Zi pason, i renditur i 50-ti, e më pas është Shqipëria e 82-ta e në fund Bosnje Hercegovina e 90-ta, në përkeqësim me vetëm një pozicion. Ekonomitë e Ballkanit Perëndimor janë në një garë  mes tyre për thithjen e investimeve të huaja, dhe në këtë garë, ekonomia e Shqipërisë dhe ajo e Kosovës nisen shumë më mbrapa se të tjerët, për shkak të këtij testimi nga ana e Bankës Botërore. Në nivel global ndërkohë, Zelanda e Re vazhdon të mbajë vendin e pare, ndërkohë që në vend të fundit renditet Somalia, ashtu si një vit më parë.

SCAN