Rakacolli: Numri i infektimeve drejt një ulje, jo masa të reja pa u zbatuar aktualet

Zv/ministrja e Shëndetësisë dhe Mbrojtjes Sociale, Mira Rakacolli thotë se situata e Covid-19 në Shqipëri është delikate dhe e vështirë, por fatmirësisht këtë javë sipas saj situata duket më e normalizuar dhe numrat po shkojnë drejt një ulje të lehtë.

”Indikatorët nuk shikohen vetëm me një ditë, por të paktën me një ose dy javë.Nëse flasim për mesataren e rasteve të reja ditore ka rënë nën 1 mijë në javën që sapo mbyllën, gjë që dy javë më parë ka qenë edhe 1100 edhe mbi 1 mijë. Sa I përket numrit të jetëve të humbura pak a shumë në numra me dy shifra, po të shikojmë numrin e jetëve të humbura me numrin total të infektuara përqindja ka mbetur njësoj, ka mbetur tek 1.7%. Kur vlerësojmë situatën nuk e vlerësojmë me një indikator , por me disa indikatorë si numri i rasteve të reja ditore, numri i rasteve të shtruara në spital, numri i atyre që kanë nevojë për kujdes intensive, numri i jetëve të humbura, por edhe numri i urgjencave. Ndërthurja e këtyre na çon në një vlerësim të përgjithshëm të situatës”,-tha ajo.

Për masat e marra, Rakacolli tha se u morën duke gjykuar mbi numrat, por edhe mbi hetimin epidemiologjik duke nxjerrë konkluzione se ku ishte mundësia më e madhe e marrjes së infeksionit dhe në atë që të gjithë e themi se masat e autorizuara nga autoritetet shëndetësore nuk zbatohen si duhet. ”Ne nuk mund të marrim masa të tjera shtesë kur nuk zbatohen ato që janë marrë”.