Rama deklaron ”fundin” e Covid-19: Ambicie për dyfishimin e pagës së mjekut brenda këtij mandati

Me të njëjtën linjë mendimi si Presidenti i SHBA-së, këtë të mërkurë kryeministri Edi Rama, tha se pandemia e koronavirusit tashmë ka mbaruar. “Pavarësisht se jemi tanimë përtej pandemisë, ajo çka kjo trupë bëri gjatë pandemisë, nuk duhet harruar kurrë”,-tha Rama nga godina e modernizuar e Shërbimit Infektiv në QSUT.

Pas emergjencës shëndetësore nga virusi dhe përballjes me largimet e vazhdueshme të mjekëve jashtë vendit, kryeministri Edi Rama ka ambicie për dyfishimin e pagave të tyre brenda këtij mandati.

“Ambicia jonë është që brenda këtij mandati ta çojmë në 100% rritjen e pagës në raport me pikënisjen. Me buxhetin e ri shkojmë në 70%”.

Godina 52-vjeçare e infektivit, ndër më të vjetrat në QSUT, përballoi ngarkesën më të madhe shëndetësore gjatë pandemisë së koronavirusit. Rikonstruksioni i spitalit filloi këtë në verë, pas qetësimit të situatës nga pandemia dhe uljes së shtrimeve në pavijone.