Rama, letër ministrave: Turkoshakë, o mbytuni ose lini anijen!

Kryeministrit Edi Rama duket se i ka sosur durimi me ministrat e tij, pas gati dy vjetësh në qeverisje. Ai ka thënë shpesh se nuk do të ketë ndryshime në qeveri, por duket se deklaratat janë bërë politikisht  nga ana e tij, ndërsa  mësohet se së fundmi u ka dërguar një letër gjithë ministrave të kabinetit duke u thënë që janë shkëputur nga realiteti i përditshëm dhe madje i ka cilësuar ata si arrogantë.

Sipas Ramës, ministrat kanë humbur kontaktet me bazën dhe me deputetët dhe orët e entuziazmit të qeverisjes janë zëvendësuar me pasdite turkoshake në kafene, në dreka e darka të gjata.

Letra e kryeministri është zbardhur nga Neësbomb.

“E pra mësojeni përpara se të bëhet vonë sepse së shpejti do jetë vonë, që unë nuk bashkëjetoj dot me këtë situatë dhe nuk i honeps dot më reflekset e sjelljeve tuaja mbi njerëzit, që nga shqiptarët e deri tek ndërkombëtarët që kanë nisur të bëjnë humor me ARROGANCEN tuaj! Dhe nuk i honeps dot më as që porositë e mia në këtë drejtim të merren si pjesë e mërzitshme e të qenit në një klasë ku fjalët e zyshës i merr era”, shkruan Rama.

“Kjo qeveri ka vetëm një armik dhe ky armik është turku që jeton brenda secilit prej jush, o mbytuni, o përgatituni për të lënë anijen”, mësohet se ka shkruar më tej Edi Rama.