Rama në ‘Flasim’: Reagimi i NATO-s ndaj Turqisë mbron edhe Shqipërinë

Në episodin e fundit të podcast-it “Flasim”, Kryeministri Edi Rama komentoi zhvillimet në Lindjen e Mesme, duke theksuar se prioritet kryesor mbetet siguria e qytetarëve shqiptarë që ndodhen atje, si dhe funksionimi i përfaqësive diplomatike dhe konsullatave shqiptare, të cilat monitorojnë situatën dhe ofrojnë ndihmë të menjëhershme.

Ai u ndal edhe te spekulimet mbi një mundësi sulmi iranian ndaj Shqipërisë, duke sqaruar se NATO ka treguar qartë në rastin e Turqisë se çdo vend anëtar është i mbrojtur, përfshirë edhe Shqipërinë.

“Çështja kërkon qetësi dhe informacion të saktë nga burimet zyrtare. Ndërsa disa vende janë prekur nga incidentet në Lindjen e Mesme, në Shqipëri disa thashetheme të pabazuara janë përhapur në mënyrë të papërgjegjshme, duke krijuar lajme të rreme mbi mundësinë e një sulmi. Dua t’i kujtoj të gjithëve se Shqipëria është pjesë e NATO-s, dhe kapaciteti i reagimit që u demonstrua në Turqi vlen për të gjitha vendet anëtare. Çdo pretendim për sulm ndaj Shqipërisë është i pabazuar dhe i prodhuar nga dezinformimi lokal,” tha Rama.