Rama sqaron akuzat e BILD: Fatkeqësisht idiotët e PD nuk kuptojnë se sa mirë e kalova me shefat e BILD kur isha në Mynih

Kryeministri Edi Rama ka treguar sot arsyet se përse është tërhequr nga padia ndaj gazetës gjermane “Bild”, e cila publikoi skandalin e përgjimeve dhe vjedhjes së votave në Dibër.

Në një mesazh në Twitter kryeministri thotë se pasi u takua disa muaj më parë me shefat editorial të gazetës, në një darkë të mbajtur në Mynih, ka vendosur të tërhiqet nga padia për arsye njerëzore.

Në sqarimin e tij, Rama nuk harron dhe të sulmojë ashpër opozitën.  “Në greqishten e vjetër idiot quhej personi që s’duhet të merrej me çështje të interesit publik, po vetëm me punët e veta. Fatkeqësisht më kanë qëlluar kundërshtarë disa që politikën e kanë si nevojë personale dhe jashtënxjerrin papushim në publik idiotësinë e tyre! Por paçka se fatmirësisht ky popull ua njeh erën prej kohësh dhe as u afrohet më, sqarimet duhen bërë për popullin jo për ta! U njoha me shefat editorialistë të BILD gjatë Konferencës së Sigurisë në Mynih dhe kaluam aq bukur sa nuk pata më motiv për ta vazhduar gjyqin. Njerëzore!”,- deklaroi kreu i qeverisë.

Pavarësisht marrëdhënieve miqësore të Edi Ramës me drejtuesit e BILD, dje gazetari që publikoi skandalin, Peter Tiede, tha se do të publikojë materiale të reja që flasin për afera të qeverisë.