Reforma Zgjedhore, Spiropali: Jemi të gatshëm për shqyrtimin e çdo propozimi nga deputetët e opozitës

Ministrja e Shtetit për Marrëdhëniet me Parlamentin, Elisa Spiropali priti këtë të enjte në një takim kryetaren në detyrë të Prezencës së OSBE-së në Tiranë, Clarisse Pasztory.

Spiropali u shpreh se shumica parlamentare mirëpret rifillimin dhe përshpejtimin e punës përmbajtësore për reformën zgjedhore me kontribut nga Prezenca e OSBE-së në Shqipëri dhe OSBE/ODIHR. Po ashtu nënvizon se janë të gatshëm për shqyrtimin e çdo propozimi nga deputetët e opozitës.

“Kemi kohë që jemi të gatshëm për shqyrtimin e çdo propozimi përmbajtësor e bashkëpunimi të hapur me deputetët e opozitës, të cilët uroj të kuptojnë më shpejt se vonë, se aktet e pahijshme dhe braktisja e detyrës nuk i pengojnë akrepat e orës të ecin”, theksoi Spiropali në një postim në rrjetet sociale.