Rektori i Vlorës: Ai që më goditi, më ka djegur edhe dy makina. Autori: Sa e shtyra!
Rektori i Universitetit të Vlorës Albert Qarri, është dukur sikur është goditur papritur me grusht, në një sallë gjatë një aktiviteti ku do të ishte i pranishëm edhe Presidenti Bujar Nishani, por ngjarja ndodhi pas një konflikti 3-vjeçar me agresorin.
Autor i incidentit është identifikuar si Kujtim Cakrani, i shoqi i një pedagogeje në Universitetin e Vlorës.
Kanë qenë pikërisht mosmarrëveshjet mes saj dhe rektorit, që e kanë nxitur Cakranin për të sulmuar Qarrin.
Vetë rektori tregoi rrjedhën e ngjarjes, për “Ora Neës” tha se prej tre vitesh shantazhohet nga agresori.
“Cakrani më ofendoi, më goditi me grusht pas shpine dhe pastaj u largua. Konflikti për shkak të detyrës. Gruaja e tij është pedagoge në Universitet, kam pasur mosmarrëveshje. Më ka shantazhuar vazhdimisht prej tre vitesh edhe përmes telefonit.
Cakranin e akuzoj edhe për djegien dy makinave të mia. E kam denoncuar në polici, është nën hetim të Prokurorisë së Vlorës prej 3 vitesh”.
Por vetë autori mohon të ketë ushtruar dhunë ndaj Rektorit.
“Nuk e godita Albert Qarrin, por e shtyva. Bashkëshortja ime e ka denoncuar Qarrin në prokurorinë Vlorës për falsifikim dokumentesh zyrtarë,” – theksoi ai.
Gjithsesi, konfliktet shkojnë deri në atë pikë nga anëtarët e oborrit akademik, sa lënë vërtet shumë për të dëshiruar.