Reshjet me intesitet të lartë, lagjia “Postobllok” në bashkinë Kuçovë nën ujë

Rritja e intensitetit të reshjeve ka bërë që lagjja “Postobllok” në bashkinë Kuçovë të mbulohet nga uji.

Banorët e kësaj lagjeje apelojnë për ndihmë dhe deklarojnë se kjo situatë e përmbytjeve krijohet çdo vit, kur ka reshje të pandërprera dhe prurje të lumit.

Reshjet e pandërprera të mbrëmjes së djeshme dhe ditës së sotme kanë nxjerrë jashtë funksionit kanalet kulluese dhe kolektorët në lagje.

Shtëpi dhe biznese në këtë lagje ndodhen nën pushtetin e ujit. Janë më shumë se 100 familje dhe disa biznese që popullojnë këtë lagje periferike të Kuçovës, ku sa herë që bie shi bllokohen kolektorët dhe uji depërton në bahçe e banesa.

Banorët shprehen se ,kjo nuk është hera e parë që ata përmbyten. Sipas tyre,ky problem, jo vetëm që nuk zgjidhet prej vitesh por sa vjen edhe përkeqësohet. Ata akuzojnë kryetarin e bashkisë Kuçovë që, sipas tyre paguhet me taksat e tyre dhe nuk ka shkuar as për ta parë gjendjen në zonë.

“Kryetari i bashkisë Kuçovë paguhet nga taksat tona dhe nuk ka ardhur as të na shikojë”.

Banorët shprehen të indinjuar për gjendjen e krijuar sepse e kanë ngritur këtë shqetësim disa herë në bashki por askush nuk ka marrë asnjë masë dhe gjendja sa vjen e përkeqësohet sa herë që bie shi i pandërprerë.

Banorët bëjnë apel për ndihmë,pasi edhe dëmet që u ka shkaktuar prania e ujit në tokat bujqësore dhe në banesa është e konsiderueshme.

E ndërsa situata përkeqësohet në këtë zonë pasi reshjet e shiut nuk janë ndalur ende, burime nga bashkia Kuçovë bëjnë me dije se, problemi kryesor që edhe ka bllokuar kolektorët në këtë zonë janë  ndërtimet e banesave mbi kolektor si dhe vërshimi i digës së liqenit të Gegës në dalje të Kuçovës.