Rikthimi i opozitës në Kuvend, Rakipllari: Një mënyrë e butë për t’u futur në zgjedhje

Këtë të enjte, PD dhe partitë aleate u panë në seancën e Kuvendit pas vendimit të Gjykatës Administrative për të pezulluar dënimet e Etikës për përjashtimin e deputetëve nga seancat për disa javë. Drejtori i informacionit në Top Channel, Robert Rakipllari tha se opozita ka gjetur një “mënyrë të butë” për t’u rikthyer, duke nënvizuar diskutimin në seancë për buxhetin.

”Opozita nuk ka alternativë tjetër, ose do shkohet në zgjedhje ose në mosbindje civile. Mesa pashë opozita ka zgjedhur një mënyrë të butë, duke diskutuar sot buxhetin, ka gjetur mënyrën e vet të rikthehet në sistem dhe të shkojë në zgjedhje.

Vendimi i Administratives ishte një arsye më shumë për t’i kthyer në sistem, por fakti që ka marrë një vendim që nuk rrëzon në themel ato dënimet e Kuvendit, por ato arbitrare, dhe rikthimi në Kuvend nga kjo pikëpamje është pjesë e gjithë kësaj logjike, që do të shkojë në zgjedhje. Nuk mund të hyjë në zgjedhje duke qenë në mosbindje civile. Mendoj se ka lidhje edhe me zgjedhjet e SHBA. Tashmë kemi narrativë tjetër që në Shtëpinë e Bardhë kemi një frymë të re”, u shpreh Rakipllari.