Rinasi u bllokua, por kontrollorët ”zhvishen” nga akuzat. Dosja kthehet për rihetim

Gjykata e Tiranës ka pushuar akuzat për tre punonjësit e “Albcontrol”, të cilët u morën të pandehur dhe mbi ta rëndoi akuza “Pengim të qarkullimit të mjeteve të transportit ajror”, ngjarje kjo e ndodhur në muajin prill 2021 në Rinas. Gjyqtarja e çështjes, Migena Laska, e ka cilësuar akuzën e ngritur nga prokuroria ndaj Flora Ndreca, Armand Fezga dhe Muhin Mezini si të padrejtë.

Gjykata ka zhveshur nga përgjegjësia penale tre personat e mësipërm, për shkak se ata nuk kanë qenë fare në punë ditën kur dhe është bojkotuar dhënia e shërbimit tek kulla e “Albcontroll”.

”Më 7 prill 2021, datë në të cilën rezulton se në Aeroportin “Nënë Tereza” janë shtyrë, pezulluar, anuluar, disa fluturime ndërkombëtare të planifikuara përgjatë asaj dite, nuk kanë qenë në detyrën e tyre të mëparshme, të kontrollori. Tre personat e marrë të pandehur nga prokuroria, nuk kanë qenë në asnjë prej turneve të datës 7 Prill 2021”.

Dosja është kthyer mbrapsht për plotësim të hetimeve, duke urdhëruar akuzën që të zbulojë personat përgjegjës që krijuan revoltën brenda radhëve të punonjësve, kjo me qëllim sabotimin e punës në këtë ndërmarrje shtetërore kaq shumë të rëndësishme që monitoron trafikun ajror.