Rindërtimi, protestuesit në Vorë: Banesat po shemben padrejtësisht

Banorët në Vorë protestuan të enjten para Bashkisë pasi nuk janë dakord me planin e rindërtimit për banesat të cilat u dëmtuan nga tërmeti i 26 nëntorit dhe tashmë do të shemben. Ndër të tjera banorët pretendojnë se shumë banesa do shemben padrejtësisht, pasi nuk janë të dëmtuara.

Banorët e Vorës shprehen se kanë kërkuar takim disa herë me kryetarin e Bashkisë, Hekuran Brahimaj, por ai nuk i ka pritur.

Për këtë arsye ata kanë tentuar të hyjnë me forcë, por nuk janë lejuar nga policia.

“Kërkesa ishte që të zbriste kryetari dhe të na sqaronte. Ndërsa kryetari tha,- “jo nuk zbres”. Por kërkoi të bënin një përfaqësim prej 4-5 vetash për të na pritur më pas në zyrë. Pas një orë na kthen përgjigje që as këtë nuk e bën dot, u anulua. Por na tha se kërkesat ti çojmë tek informacioni dhe se më pas do t’i shohim ata”, u shpreh një qytetar.

Banorët i ka dërguar listën me kërkesa Bashkisë Vorë dhe kërkojnë që tu lëshohet një dokument i vlefshëm se çfarë do ndodhe pasi banesat dhe bizneset e tyre të shemben.

“Objektet e padëmtuara që janë brenda zonës së dëmtimit të përjashtohen nga shembja. Subjektet tregtare që kanë funksionuar në katet e para të pallateve të marrin kompensim si subjekte tregtare. Të lidhet një kontratë se kur dhe ku do e marrin sepse duam që këto biznese të kompensohen në vende ku kanë pasur aktivitetin”, u shpreh ai.

Siç bëjnë të ditur banorët e Vorës janë planifikuar të shemben rreth 70 objekte të cilat janë të padëmtuara nga tërmeti i 26 nëntorit.

“Për 12 pallate të dëmtuara shemben 70 godina të tjera të padëmtuara”, sqaron ai.

Bashkia Vorë nuk ka një reagim në lidhje me planin e rindërtimit në këtë zone, ndaj banorët do të protestojnë sërish të premten.

Tërmeti i 26 nëntorit nxori të pabanueshëm 13 pallate dhe disa shtëpi e godina biznesesh.