Rinia në protestë, Spahiu: Dhuna, policia me skenar për të prishur revoltën

Ish-deputeti i LSI-së, Përparim Spahiu ka folur për protestat që po mbahen në të gjithë Shqipërinë. Spahiu tha se ishte vetë i pranishëm në disa prej tyre, ndërsa shtoi se kjo nxitje e dhunës u bë me skenar dhe në mënyrë të qëllimshme nga policia, në mënyrë që protesta të mos ishte me paqësore e nisur nga të rinj që nuk kishin lidhje me politikën.

”Natën e parë të protestës deri kur nuk kishte prezencë të policisë, protesta ishte e qetë dhe shumica e të rinjve aty ishte apolitikë. Kur fillon strategjia policeske për t’i shpërndarë dhe situata agravoi dhe ndryshoi. Unë nuk jam organizatori dhe as nuk jam pjesë e gjuajtjes me gurë dhe thyerjes së xhamave, por duhet thënë se këto janë gjëra normale dhe ndodhin kudo në botë. Por protestat kanë gjënë korrekte dhe në masën e duhur të reagimit të të rinjve. Sjellja e policisë ishte e skenarizuar dhe mënyra e sjelljes në natën e parë ishte në mënyrë që të acarohej dhe protesta të mos ishte më paqësore. Unë e kam quajtur skenar mënyrën e sjelljes së policisë dhe të qëllimshme”, tha Spahiu për ”Report Tv”.